الفراخ المشويه
المقادير :
فرخة مقطعه 8 قطع (علشان تستوى كويس من جوه )
مقادير التتبيلة :
نص معلقة صغيرة ملح
نص معلقة صغيرة فلفل اسود
نص معلقة صغيرة كمون
نص معلقة صغيرة باربريكا
نص معلقة صغيرة كزبرة ناشفة
نص معلقة صغيرة قرفة
نص معلقة صغيرة جنزبيل
نص معلقة صغيرة كركم
نص معلقة توم بودره
نص معلقة بصل بودره
نص معلقة شطة
ربع معلقة زعتر
ربع معلقة روزمارى
معلقة سكر ( بيخلى طعم الفراخ مسكر )
معلقة زيت ( بيخلى لحم الفراخ طرى من جوه )
معلقة خل ( بيشيل الزفارة من الفراخ )
عصير ليمونه ( بيشيل الزفاره من الفراخ)
الطريقة :
تجيبى قطع الفراخ وتعملى فيها فتحات صغيرة بالسكينة علشان تتشرب التتبيله كويس
تجيبى طبق وتخلطى فيه كل التوابل اللى انا كتبتها وتحطى عليها الليمون والخل والزيت وتقلبيهم مع بعض وبعدين تحطى قطع الفراخ فى كيس نايلون وتحطى عليهم خلطه التوابل وتقلبيهم كويس وتربطى الكيس وتحطيه فى التلاجة وكل فتره تقلبيهم مع بعض من بره والكيس مربوط
وياريت تسيبيهم فى التلاجه ليله كامله او اقل حاجه ساعتين وبعدين تجيبى طاسه كبيرة وتحطى فيها الفراخ المتبله وتحطى معاه ميه التتبيله اللى فى الكيس وتحطيهم على النار وتغطيهم وتوطى عليهم لغايه الفراخ ماتستوى نص سوا ( تقريبا هتاخد ربع ساعه على النار) وبعدين تدهنى شبكه فرن البوتاجاز بالزيت وترصى عليها الفراخ وتولعى فوقيها الشوايه وياريت تكون الشبكه بعيده شويه عن الشوايه علشان الفراخ مش تتحرق
وتجيبى قطعتين فحم وتحطيهم على عين البوتاجاز من فوق وتولعى عليهم لغايه ما الفحم يولع ويبقى لونه احمر وبعدين خدى الفحم المولع وحطيه على الرف اللى تحت الشبكه اللى عليها الفراخ ... يعنى يكون الفحم تحت الفراخ علشان لما الدهون اللى فى الفراخ تنقط .. تنقط على الفحم المولع ... فيطلع الدخان بتاع الفحم على الفراخ لغايه ما الفراخ تتشوى وتحمر كويس .. اقلبيها على الناحيه التانيه علشان تتشوي من كل الاتجاهات ونقطى كام نقطه زيت على الفحم علشان كل الدخان اللى فى الفحم يطلع لغايه ماالفحم يطفى ويخلص ..
وبعد الفراخ مااتشوت رصيها فى طبق التقديم ورشى عليها بقدونس
وبالف هنا وشف
نرجوا منكم مساعدتنا فى نشر الصفحة بالضغط على الرابط التالى
للمزيد من الوجبات و اشهى الحلويات like و زوروا صفحتنا على الفيسبوك
ليست هناك تعليقات:
إرسال تعليق